Од таборот на поранешниот американски претседател Бил Клинтон, беше упатена покана до Министерството за правда да ги објави сите документи поврзани со истрагата против покојниот финансиер и осуден сексуален престапник Џефри Епстин.
Целта, велат тие, е да се избегнат инсинуации за прекршоци против лица „кои постојано се ослободени од сомневања“. Овој повик дојде откако одделот минатиот петок, 19 декември, објави дел од документите, вклучувајќи фотографии од Клинтон, од кои една е направена во џакузи, пишува USA TODAY.
Министерството за правда е критикувано за задржување на стотици илјади страници документи и отстранување и цензурирање на некои, особено оние што го споменуваат сегашниот претседател Доналд Трамп. Жените кои го обвинија Епстин за злоупотреба, бројни претставници и портпаролот на Клинтон, Ангел Урена, го кренаа својот глас.
Урена изјави на социјалните мрежи дека на Клинтон не му е потребна заштита од објавувањето на преостанатите досиеја во кои тој е споменат или фотографиран.
Тој нагласи дека „селективните објави за инсинуирање прекршоци“ само ќе го потврдат „широко распространетото сомневање“ дека целта на објавите е да се создаде „инсинуација“, а не да се постигне транспарентност.
Конгресот донесе закон, потпишан од претседателот Доналд Трамп, со кој се бара објавување на сите досиеја до 19 декември, освен оние што ги именуваат наводните жртви, содржат прикази на сексуална злоупотреба на деца или би можеле да му наштетат на судскиот процес.
Сепак, кога документите беа првично објавени, заменик-главниот обвинител Тод Бланш минатиот петок призна дека стотици илјади дополнителни страници сè уште се разгледуваат. Тој му објасни на Конгресот дека некои документи би можеле да останат тајни со повикување на законски привилегии, како што се интерните комуникации адвокат-клиент.
Бланш објави дека повеќе документи ќе бидат објавени во наредните недели, а законот бара од одделот да достави список на досиејата што се задржани во рок од 15 дена, со образложение.
Политичкиот притисок расте, па затоа двајца членови на Претставничкиот дом се заканија дека ќе поведат постапка против државната обвинителка Пам Бонди за непочитување на судот.
Таа, од друга страна, изјави дека администрацијата на Трамп е најтранспарентната во историјата. Во ноември, самиот Трамп го повика Министерството за правда да ги истражи врските на Клинтон со Епстинн, а поранешниот претседател се соочува и со судска покана од Комитетот за надзор на Претставничкиот дом.