Времен прекин на огнот е прогласен меѓу провладините милиции и исламистичката опозиција во четири сириски населени места, соопшти Сирискиот центар за мониторинг на човековите права.
Прекинот на огнот започна во градовите Забадани и Мадаја, во близина на Дамаск, кои се под контрола на бунтовниците, како и во селата Кафраја и Фуа, во провинцијата Идлиб, кои се контролирани од силите на сирискиот претседател Башар ал Асад.
Неколку часа пред почетокот на прекинот на огнот коалиција на исламистички бунтовници, предводена од Фронтот „Ан Нусра“, кој е поврзан со Ал Каеда, зазеде делови од Фуа по жестоки судири со провладините милиции, поддржани од либанското движење Хезболах.
Според западните медиуми договорот за прекин на огнот е постигнат со посредство на Турција и Иран.
Минатиот месец две примирја во овие четири населени места беа безуспешни.