Одлуката на Германија на своја територија да распореди американско нуклеарно оружје ги зголемува тензиите во Европа, го нарушува стратешкиот баланс и ја принудува Русија да преземе мерки за заштита на својата национална безбедност, изјави Дмитриј Песков, портпарол на рускиот претседател Владимир Путин.
– Тоа е уште еден чекор, за жал, мошне сериозен, во насока на зголемување на тензиите на европскиот континент, истакна тој.
Песков меѓутоа не наведе кои се тие конкретни возвратни мерки на Москва.
– Тоа се чекори потребни за обезбедување на националната безбедност и воспоставување на стратешки паритет, рече тој.
Претходно германската телевизија ЗДФ објави дека во авиобазата на германските вооружени сили (Бундесверот) во градот Бухел во покраината Рајнланд-Пфалц, деновове почнуваат подготовки за разместување на нови американски атомски бомби.