Новиот италијански претседател и досегашен судија на Уставниот суд Серџо Матарела денеска положи свечена заклетва, со што официјално ја презема должноста претседател од Џорџо Наполитано.
Италијанските пратеници на 31 јануари го избраа Матарела (73) за нов, 12. претседател на Италија.
Матарела, поддржан од премиерот на Италија Матео Ренци, беше избран по три неуспешни круга глалсање во италијанскиот Парламент. Тој во четвртиот круг гласање доби 665 гласа од италијанските пратеници, што е повеќе од потребните 505 гласа, односно просто мнозинство неопходно за избор на претседател во четвртиот круг од гласањето.
Изборот на Серџо Матарела за нов претседател на Италија покажува дека премиерот Матео Ренци, кој го поддржа, има цврста контрола над партијата, што има 415 пратеници во италијанскиот парламент.
Серџо Матарела, кој е член на владејачката Демократска партија е поранешен демохристијанин од Сицилија, што влегува во парламентот откако неговиот постар брат Пјерсанти беше убиен од мафијата во 1980 година.
Досегашниот претседател Џорџо Наполитано (89), што на функцијата претседател беше девет години, на 14 јануари поднесе оставка.