Повозрасните мажи кои се заразуваат со Ковид-19 имаат двојно поголема веројатност тешко да заболат, но и да починат од компликации, одошто жените, стои во новата студија објавена денеска.
Новите научни откритија укажаа на тоа дека мажите кои имаат над 60 години можеби повеќе ќе треба да се потпрат врз вакцините против вирусот со цел да се заштитат. Истражувачите од Универзитетот Јејл исто така утврдиле дека мажите на оваа возраст имаат послаб имунолошки одговор на вирусот отколку жените.
Активирањето на Т-клетките, кои можат да го запрат ширењето на смртоносниот вирус, кај жените заразени од Ковид-19 било значително посилно, објаснуваат авторите на студијата.
„Уште поважно, откривме дека слабиот одговор на Т-клетките е во корелација со возраста на пациентите, како и со лошиот исход на болест кај мажите, но не и кај жените пациенти“, продолжија тие.
Тимот анализирал реакции на имунитет кај 17 мажи и 22 жени кои биле примени во болница веднаш откако биле заразени. На секои три до седум дена, пациентите давале крв и урина, а им биле собирани и брисеви од грло и нос.
Пациентите приклучени на респиратори не биле предмет на анализата од престижниот универзитет.