Националното антикорупциско биро на Украина (НАБУ) и Специјализираното антикорупциско обвинителство соопштија дека откриле наводна криминална организација предводена од висок функционер на Канцеларијата на главниот обвинител, која ги штитела измамничките кол-центри и перела големи суми пари. Главниот обвинител Руслан Кравченко би можел да биде поврзан со случајот. Канцеларијата на главниот обвинител денеска потврди дека во неговата канцеларија биле извршени претреси во рамки на истрагата, пренесува „Киев Индипендент“.
НАБУ јавно не го наведе името на наводниот организатор, туку го опиша како раководител на една од структурните единици на Канцеларијата на главниот обвинител.
Според извор од органите за спроведување на законот, НАБУ на 4 септември го уапсил Сергеј Кропива, заменик-раководител на Одделот за меѓународна соработка на Канцеларијата на главниот обвинител, во врска со овој случај.
Според истражителите, функционерот ја формирал групата во средината на 2025 година, ангажирајќи активни обвинители и соработници надвор од Канцеларијата на главниот обвинител.
Групата, наводно, систематски примала мито во замена за овозможување непречена работа на измамнички кол-центри. Истражителите наведоа дека овие центри биле насочени и кон украински граѓани и кон странци.
Според НАБУ, управувањето со измамнички кол-центри е еден од најпрофитабилните облици на криминална активност во Украина. Парите, наводно, биле перани преку купување недвижности, шеми со сопствеништво преку трети лица и банкарски сметки на соработници.
Повеќе од 20 милиони гривни (386.000 евра), според истражителите, биле потрошени на недвижности, накит и друг вреден имот.
Имот вреден најмалку 12 милиони гривни (232.000 евра), наводно, бил регистриран на трети лица со цел да се прикрие неговиот вистински сопственик, вклучително и имот во станбен комплекс во близина на Карпатите.
Уште 10 милиони гривни (околу 193.000 евра), според НАБУ и Специјализираното антикорупциско обвинителство, биле уплатени на банкарски сметки на соработници и прикажани како легален приход од деловни активности.
Досега се идентификувани петмина наводни членови на организацијата. Според истражителите, функционерот кој ја предводел групата работел по налог и под заштита на лице означено како „шеф“. Неговото патронимско име, според снимките што ги објави НАБУ, изгледа дека е Андријович.
Во формалната структура на Канцеларијата на главниот обвинител, високиот обвинител би можел директно да му одговара на главниот обвинител Кравченко, чие патронимско име е Андријович. НАБУ, сепак, не го поврза директно Кравченко со случајот.
Кравченко, според извештаите, повеќе од 12 часа бил недостапен, пред извори на весникот „ЗН.УА“ подоцна денеска да соопштат дека бил пронајден во една клиника во Киев.
И покрај претходните деманти, Канцеларијата на главниот обвинител потврди дека детективи на НАБУ во текот на ноќта извршиле претреси во канцелариите што ги користат Кравченко, неговиот прв заменик и други вработени.
Канцеларијата соопшти дека ќе соработува со истрагата и дека размислува за отпуштање на вработениот кој наводно бил вмешан во шемата со измамнички кол-центри.
Истовремено, Канцеларијата ја доведе во прашање оправданоста на претресите, наведувајќи дека судските материјали не содржат директни докази дека Кравченко некому наредил да ги штити измамничките кол-центри, да ги попречува истрагите, да ги предупредува осомничените за планираните истражни дејствија, да прима незаконски пари или да има корист од приходите наводно поврзани со оваа шема.
Канцеларијата наведе дека поради тоа доволноста на доказите врз основа на кои биле одобрени претресите во просториите на Канцеларијата на главниот обвинител бара посебна правна оценка.