Главниот штаб на вооружените сили на Украина неодамна соопшти дека дел од руските воени единици го напуштаат анектираниот дел на украинската област Запорожје. Тие, исто така, објавија дека Русите на некои места подготвуваат евакуација на членовите на локалните окупациски администрации назначени од нив.
Медуза, независен руски медиум, во разговор со извори блиски до Кремљ и руската влада дозна дека Русија сепак не планира целосно повлекување од регионот. Сепак, изворите шпекулираат дека Москва е подготвена да ја напушти нуклеарната централа Запорожје, која е под руска контрола уште од раните фази на инвазијата.
Рускиот претседател Владимир Путин на 5 октомври потпиша посебен декрет за префрлање на електраната на Русија и формирање на државна корпорација која ќе управува со неа. Иако во минатото негираше каква било можност за напуштање на Запорожје, Кремљ сега планира да ја пренесе контролата над нуклеарната централа на Киев или на Меѓународната агенција за атомска енергија (МААЕ), пишува Медуза.
МААЕ е подготвена да преговара со двете конфликтни страни и континуирано се залага за создавање безбедносна зона околу нуклеарната централа. Директорот на МААЕ, Рафаел Гроси, на 2 декември најави дека решение кое ќе гарантира безбедност во нуклеарната централа може да се постигне пред крајот на годината.