Најмалку три лица ги загубија животите, а повеќе од половина милион луѓе останаа без струја во американските држави Пенсилванија, Охајо и неколку други поради бура.
Во Пенсилванија, 425.000 корисници се без струја, а во Охајо, 40.000, објави АП. Илјадници луѓе останаа без струја и во соседните држави, Мичиген, Њујорк и Западна Вирџинија. Метеоролозите предупредуваат дека утре доаѓа уште една бура.
Бурниот ветер собори дрвја и далноводи, а властите предупредија дека може да потрае една недела за целосно да се обнови електричната мрежа.
Маж бил усмртен од струја во Пенсилванија додека се обидувал да изгасне пожар во близина на далновод, соопшти полицијата.
На сличен начин загинал 22-годишен маж, додека 67-годишен маж загинал кога врз него паднало дрво во близина на Питсбург. Властите ги предупредија жителите во погодените подрачја да бидат внимателни поради паднатите далноводи и паднатите дрвја.