Израелскиот премиер Бенјамин Нетанјаху денес, по средбата со американскиот претседател Доналд Трамп, изјави дека го поддржува планот од 21 точка на Белата куќа за прекин на војната во Газа, објавен денес, и рече дека сите израелски заложници што ги држи Хамас треба да бидат вратени во рок од 72 часа.
„Го поддржувам вашиот план за прекин на војната во Газа, кој ги постигнува нашите воени цели. Ќе ги врати сите наши заложници во Израел, ќе ги демонтира воените капацитети на Хамас и неговото политичко владеење и ќе обезбеди Газа никогаш повеќе да не претставува закана за Израел“, рече Нетанјаху на прес-конференција во Белата куќа, пренесува Би-Би-Си.
Тој рече дека планот гарантира дека Израел никогаш повеќе нема да биде под закана од Хамас.
„Воените цели на Израел мора да се постигнат затоа што ние не ја водевме оваа ужасна битка, жртвувајќи ги најдобрите од нашите млади луѓе, за да може Хамас да остане во Газа“, рече тој, додавајќи дека сите заложници, живи и мртви, треба да бидат вратени во рок од 72 часа.