Израелскиот премиер Бенјамин Нетанјаху изјави дека се надева на мирна следна фаза од договорот меѓу Израел и Хамас, но нагласи дека условите на американскиот претседател Доналд Трамп се „многу јасни“ – Хамас мора да се разоружи и демилитаризира, или „ќе има пекол“.
„Се согласивме да му дадеме шанса на мирот“, рече Нетанјаху, еден ден по кратката посета на Трамп на Тел Авив, што ја означи првата фаза од неговиот план за Газа, објави Си-Би-Ес.
Нетанјаху во интервју за Си-Би-Ес Морнингс нагласи дека сега кога живите заложници се вратени, следниот чекор мора да биде демилитаризација и разоружување.
„Прво, Хамас мора да се откаже од своето оружје. И второ, сакате да бидете сигурни дека нема фабрики за оружје во Газа. Нема шверц на оружје во Газа. Тоа е демилитаризација“, рече тој.
Трамп вчера предупреди дека ако Хамас не се согласи, „ние ќе го разоружиме – и тоа ќе се случи брзо и можеби насилно“, рече тој, додавајќи дека „разоружувањето ќе се спроведе“.
Нетанјаху рече дека се надева дека тоа нема да се случи и дека сè ќе се реши мирно.
Договорот постигнат со посредство на администрацијата на Трамп предвидуваше ослободување на 20 преостанати живи израелски заложници во замена за речиси 2.000 палестински затвореници и притвореници што ги држи Израел, јавува Танјуг.
Хамас, исто така, ги предаде останките на четворица израелски заложници, а уште четири тела беа предадени синоќа.
Форумот за заложници и исчезнати семејства повика мировниот план да биде суспендиран „додека не се врати секое починато лице“.
Вкупно, Хамас треба да ги предаде телата на 28 починати заложници на Израел.