Три лица починаа во семеен дом во шпанскиот град Табоадела за време на прекин на електричната енергија во земјата, а полицијата се сомнева дека причина за смртта е труење со јаглерод моноксид, објавува порталот Сер.
Според извори вклучени во истрагата, починале брачен пар, на возраст од 81 и 77 години, и нивниот 56-годишен син, кои биле пронајдени мртви утрово.
Истражителите веруваат дека неправилното согорување на електричен генератор предизвикало јаглерод моноксид, кој потоа се проширил низ куќата однадвор.
Се додава дека уште три лица се починале во одделни инциденти низ Галиција, мажи на возраст од 56, 80 и 86 години, а причината за смртта не е објавена.
Покрај тоа, уште две лица беа префрлени во болница поради труење со јаглерод моноксид во А Коруња.
Во Мадрид, едно лице почина, а 13 претрпеа лесно труење со јаглерод моноксид по пожар во куќа за време на прекин на електричната енергија во понеделник.
Полицијата соопшти дека свеќа го предизвикала пожарот и дека пет лица се задржани во болница на набљудување, објави порталот „20 минути“.
За потсетување, во понеделникот Шпанија и Португалија беа погодени од голем прекин на електричната енергија, оставајќи милиони луѓе без електрична енергија. Извештаите укажуваат на проблеми со европската електрична мрежа, при што делови од Франција исто така се без струја.