НАТО моментно не може да ги заштити балтичките земји од евентуална руска инвазија, изјави генерал Бен Хоџис, командант на копнените сили на НАТО во Европа.
– Вистина е дека Русија може побрзо да ги заземе балтичките земји отколку што ние можеме да помогнеме, истакна Хоџис во интервју за германскиот неделник „Цајт“.
Во Полска моментно се одржуваат воени вежби „Анаконда-16“, во кои учествуваат 31.000 војници од 24 земји. Тие се подготвуваат да одговорат на евентуален агресор, кој би ги нападнал балтичките држави и северниот дел на Полска. На 8 и 9 јули во Варшава ќе се одржи средба на високо ниво на НАТО, на која се очекува да биде одобрено зајакнување на присуството на силите на Алијансата во источниот дел на Европа.
– Маневрите беа критикувани од Русија. Официјално тоа се воени вежби на Полска, а не на Алијансата. Некои земји како Германија и Франција сметаат дека е преголема провокација кон Русија да ги наречеме маневри на НАТО, истакна американскиот генерал.