Западните сојузници се подготвуваат да распоредат четири баталјони, со околу 4.000 војници, во Полска и во балтичките држави во рамките на мерките на НАТО за зајакнување на границата со Русија. Распоредувањето е поради интензивираната воена активност на Русија, изјавија вчера официјални претставници за „Волстит џурнл“.
Најверојатно два баталјона ќе бидат од САД, а по еден од Германија и од Велика Британија.
Американскиот заменик-секретар за одбрана Роберт Ворк за време на неговата посета на Брисел изјави дека распоредувањето на војници на границата е одговор на руската активноста околу балтичките држави – Литванија, Летонија и Естонија, каде се зголемуваат тензиите.
– Русите изведуваат голем број воени вежби на границите со многу војска. Од наша гледна точка можам да кажам дека тоа е исклучително провокативно однесување, посочи Ворк.
Русија тврди дека воените вежби и распоредувањето на војска на границата е одговор на распоредувањето на сили на НАТО и агресивните акции кон Москва.
Германија вчера најави дека планира за распоредување на баталјон во Литванија, но оти нема донесено конечна одлука.
Полска и балтичките држави инсистираат на што поголемо присуство на НАТО на нивна територија. Но, распоредувањето на сили не треба да е во спротивност на Договорот од 1997 година меѓу Русија и НАТО, со кој се забранува распоредување на големи трупи на руската граница.