Генералниот секретар на НАТО Андерс Фог Расмусен денеска ја повика Русија „да и го врати“ Крим на Украина.
– Анексијата на Крим кон Руската Федерација е незаконско, не го признаваме и за нас полуостровот е дел од Украина. Ја повикуваме Русија да и го врати, изјави тој пред новинарите. – Инсистираме на целосно повлекување на руските војници од украинската граница, гледаме повлекување, но се уште има десетици илјади војници во тој регион и нивното присуство таму не е оправдано, нагласи Расмусен.
Тој ги оцени руските воени активности во Крим како агресивни и незаконски и појасни дека украинската криза, која се случива на прагот на НАТО ја става Алијансата пред нова ситуација во однос на безбедноста, која бара изработување на нови одбранбени планови.
Расмусен изјави дека изготувањето на тие планови веќе е во тек. – Ќе оцениме што уште треба да се направи, украинската криза покажа дека листата на закани се зголемува и тие стануваат непредвидливи, додаде тој.
Според него, Русија се обидела со сила да ги измени границите. – Многу е важно меѓународната заедница да и даде економска поддршка на Украина, додаде Расмусен.
Во врска со планираната нова операција на НАТО во Авганистан „Решителна поддршка“ Расмусен изрази увереност дека таа ќе може да почне на 1 јануари следната година.
Во однос на пртседателските избори во Сирија пак изјави дека тие претставуваат фарса. – Тие не се во согласност со меѓународните стандарди за слобода и транспарентност и верувам дека ниту еден сојузник нема да ги признае резултатите, посочи Расмусен.