НАТО најостро го осудува континуираниот развој на програмата за балистички ракети и нуклеарно оружје во Северна Кореја и бара од неа да се воздржи од провокативни акции.
– Провокативните акции на Северна Кореја претставуваат директно кршење на резолуцијата на Советот за безбедност на Обединетиѕе нации и сериозно ја поткопуваат регионалната стабилност, ги загрозуваат шансите за траен мир на Корејскиот Полуостров и се закана за меѓународниот мир и безбедност, се наведува во соопштението од состанокот на министрите за надворешни работи на земјите-членки на Алијансата.
НАТО бара од Северна Кореја да се воздржи од провокативни акции и да ги почитува своите меѓународно-правни обврски и да се откаже од сите нуклеарни програми, како и да се ангажира во преговорите за денуклеаризација.
На денешниот состанок министрите освен за Северна Кореја, разговараа и за ситуацијата во Сирија, за дополнителните мерки со цел да се зајакне противвоздушната одбрана на соседна Турција, но и за случувањата во Мали и во Демократска Република Конго.