НАСА има идеја над Венера да постави град кој лебди и во кој за почеток би живееле астронаути, а во тек на мисија од 30 дена, оваа вселенска агенција би требало да префрли тим кој во атмосферата на Венера ќе постави балони, слични на дирижабл во рамките на кои би се наоѓал просторот за живот.
Меѓутоа за сето тоа се потребни неколку децении, бидејќи Венера која што е позната како утринска ѕвезда е место кое изобилува со сулфур и температура која достигнува и до 500 степени Целзиусови, а притисокот е 90 пати повисок од овој на Земјата.
Површината на оваа планета е толку топла што на неа се топи метал. Сепак само 50 километри над неа, условите се слични со оние на Земјата и атмосферскиот притисок е ист како на нашава планета, а аеропросторот нуди доволно заштита од соларна радијација, поради што НАСА планира во тој простор да постави град што лебди.
Проектот кој што е наречен Хавок се наоѓа во фаза на студија на изработка, што дава надеж дека оваа мисија може да стане реалност.
Е. Г.