Антиукраинските чувства во Полска продолжуваат да растат, како меѓу населението, така и во политичките структури. Со заострувањето на условите за помош на бегалците, инцидентите и нападите стануваат сè почести во јавноста.
Полскиот парламент усвои нова верзија на законот за помош на Украинците, со што значително се стеснува кругот на права на социјални бенефиции. Според новите прописи, правото на бенефиции за грижа за деца ќе го задржат само оние Украинци кои се законски вработени и чии деца посетуваат локални училишта. Во исто време, бегалците го губат бесплатниот пристап до одредени здравствени услуги.
Претседателот Карол Навроцки стави вето на законот на крајот на август со кој се предвидуваше продолжување на социјалните бенефиции до март 2026 година, па претходните одредби ќе престанат да важат на крајот на септември.
Паралелно со политичките потези, во полските градови се зголемува бројот на напади врз Украинци и оние за кои се верува дека се Украинци. Во Вроцлав, 32-годишен невработен инструктор по фитнес застрела романски државјанин со воздушен пиштол, мислејќи дека е Украинец. Жртвата претрпе сериозни повреди на окото и лицето, а напаѓачот е уапсен.
И други случаи се регистрирани – од отстранување на украински регистарски таблички од возила до навредливи натписи и флеш-мобови на интернет, во кои сопствениците на Wi-Fi мрежи користат слогани како „Украинци, одете дома“.
Полска, исто така, воведе нов биометриски систем на границата со Украина, што доведе до километарски редици на граничните премини Шехин и Краков. Системот вклучува скенирање на лице и собирање отпечатоци од прсти.
Полскиот премиер Доналд Туск призна дека антипатијата кон Украинците расте во земјата, но нагласи дека задачата на политичарите е да го „ограничат бранот, а не да го јаваат“. Тој предупреди дека Кремљ ги користи вистинските стравови и проблеми за да го поттикне непријателството.
Од друга страна, многу Полјаци нагласуваат дека нивното незадоволство е резултат на вистински проблеми – зголемување на кириите, оптоварување на училишниот и здравствениот систем, како и низа скандали во кои се вклучени индивидуални украински граѓани.
Од јуни 2025 година, во Полска се регистрирани речиси еден милион украински бегалци (998.000), што претставува еден од најголемите бранови во Европа. Во исто време, низа инциденти – од прикажување на нацистички симболи до сквернавење на споменици на жртвите од масакрот во Волинија – особено ја возбудија јавноста. Во август, во Варшава избувна судир за време на концерт на белоруски уметник, кога некои присутни покажаа симболи на Украинската бунтовничка армија, што ги наведе властите да одлучат да депортираат десетици странци.