Бразилската полиција трага по осомничено лице за киднапирање на две странски туристки и за силување на едната од нив. Жените биле нападнати во квартот Копакабана во Рио де Жанеиро.
За киднапирањето и силувањето приведени се двајца мажи на возраст од 20 и 22 години, а полицијата трага по третиот осомничен. Жените биле одведени во едно од бедните предградија на Рио де Жанеиро, каде биле држени шест часа, заплашувани и тепани, а едната од нив била и силувана.
Националноста на жртвите не е објавена, но бразилските медиуми објавија дека силуваната жена е Американка. Жените неколку месеци во Рио де Жанеиро го изучувале португалскиот јазик.
Жртвите ги препознале напаѓачите. Кај еден од нив бил пронајден мобилниот телефон на една од жените. Осомничените ја користеле и кредитната картичка на една од жртвите.
Според податоците на Министерството за здравство во Бразил од јануари до јуни 2012 година регистрирани се повеќе од 3.500 силувања.