Припадник на владејачките талибанци во Авганистан отвори оган врз база на Обединетите нации во Кабул, при што полесно рани еден чувар, а подоцна беше пронајден мртов, соопшти денеска мисијата на ОН во земјата.
Вооружен напаѓач вчера пукал кон стражарско место на ОН, а безбедносните сили не возвратиле.
Чуварот, кој се здобил со полесни повреди, бил згрижен во болница, соопштија Обединетите нации.
Талибанскиот борец подоцна беше пронајден мртов на локација надвор од базата на ОН. Во соопштението на ОН не е појаснето како загинал борецот.
Обединетите нации и талибанците водат одвоени истраги за инцидентот.
Авганистанското Министерство за внатрешни работи денеска соопшти дека инцидентот се случил поради недоразбирање, без да прецизира што значи тоа.