Најмалку едно лице почина, а 47 други се повредени од сè уште непознати причини на стадион во Лима за време на собир на навивачи пред фудбалско дерби, изјави министерот за здравство на Перу.
„На стадионот се случи тажен инцидент во кој беа повредени 47 лица и, за жал, беше регистриран еден смртен случај“, изјави министерот Хуан Карлос Веласко за новинарите, без да прецизира што точно се случило.
Меѓу повредените има тројца малолетници, а 39 лица се однесени во болница. Тројца се во критична состојба.
Првично, се зборуваше за уривање на трибина на стадионот „Алехандро Вилануева“, но фудбалскиот клуб „Алијанза Лима“ и пожарникарите го негираа ова.
Клубот изрази жалење за смртта на навивачот, но на социјалната платформа X беше нагласено дека тоа не се должи на „уривање на ѕидови или структурни недостатоци на стадионот“.
Службеник на противпожарната служба, исто така, им рече на новинарите дека „структурата на јужната трибина се чини дека е во добра состојба“ и дека на теренот нема „урнати ѕидови или остатоци“.
Дербито помеѓу фудбалскиот клуб Алијанза Лима и Универзитарио сепак ќе се одржи на друг стадион во Лима денеска во 20 часот по локално време.