Најмалку 94 лица, меѓу кои и четири деца, се удавија денеска при бродолом во близина на островот Лампедуза во јужниот дел на Италија.
Според спасувачките екипи, досега се спасени 151 од околу 500-те имигранти кои патувале со бродот. Најголемиот број од илегалните имигранти на бродот се по потекло од Сомалија и Еритреја.
Градоначалничката на Лампедуза Џузи Николини соопшти дека кога бродот почнал да тоне, имигрантите запалиле оган со цел да испратат сигнал за помош, но огнот се проширил и го опожарил пловилото.
Во потрагата за преживеаните се вклучени бродови и хеликоптери на крајбрежната стража и на царината, но и приватни јахти.
Во Лампедуза допатуваа и италијанските министри за внатрешни работи и за интеграција, Анџело Алфано и Сесил Киенж.
Во понеделникот, 13 имигранти се удавија при обидот од еден насукан брод да допливаат до брегот на Сицилија.