Најмалку 30 мигранти се водат за исчезнати и се стравува дека се мртви, откако нивниот брод денеска се превртел во Медитеранот, во близина на брегот на Тунис, соопшти Агенцијата за миграција на Обединетите нации (ИОМ) , пренесе ДПА.
ИОМ на Твитер соошти дека досега се извлечени телата на шест мигранти.
Бродоломот го преживеале 34 мигранти, кои биле спасени од туниските власти. Бродот тргнал вчера од Либија, а на него имало 70 мигранти, додаде ИОМ.
Либија е главната транзитна рута за мигрантите, кои се обидуваат да стигнат до Европа по море откако во оваа северноафриканската земја завладеа хаос по бунтот во 2011 година, со кој беше соборен долгогодишниот диктатор Моамер Гадафи, појаснува ДПА.
Секоја година, илјадници мигранти ги ризикуваат своите животи преминувајќи од Тунис и Либија во потрага по подобар живот во Европа.
Извор: МИА