Најмалку 10.000 француски војници ќе бидат распоредени за да се зајакне безбедноста на „најслабите точки на територијата“ по џихадистичките напади во Париз, во кои минатата недела беа убиени 17 луѓе.
Францускиот министер за одбрана Жан-Ив Ле Дриан изјави дека претседателот Франсоа Оланд ја повикал армијата да учествува во обезбедување на чувствителни точки на територијата, укажувајќи на „големи закани“ со кои е соочена државата.
Министерот за одбрана истакна дека тоа е „првпат да се мобилизираат француските сили со тие размери на територијата на државата“.
Околу 5.000 полицајци и припадници на жандармеријата се мобилизирани за да се заштитат 717 училишта и места каде се собираат Евреи во Франција додека трае потрагата по соучесници на напаѓачите од Париз.