Комесарот за човекови права на Советот на Европа, Нилс Муижниекс денеска го повика Азербејџан да престане да ја крши слободата на говорот, особено во работата на новинарите и корисниците на социјалните мрежи.
– Прогонот на новинари и други лица кои изразуваат критички ставови во Азербејџан, е причина за силната загриженост за состојбата со човековите права, изјави Муижниекс при објавувањето на извештајот за оваа кавкаска држава.
Муижниекс, кој кон крајот на мај беше во посета на Азербејџан, побара властите во Баку да ги ослободат сите лица приведени заради изразување на мислење и да направат измени во законодавството и судската пракса, кои ќе ги гарантираат слободата на говорот и на собирања.
Комесарот побара да се обезбеди гаранција за независност и непристрасност на судовите, кои, според него, се доста строги кон обвинетите новинари.
Тој повика на целосно ослободување од кривична одговорност на обвинетите за клевета и ги осуди неодамна направените законски измени кои, како што рече, „имаат за цел да го олеснат казнувањето за ставови изнесени преку Интернет“.
– Бранот од апсења, прогони и електронско следење ги стави под лупа корисниците на социјалните мрежи. Оваа пракса треба под итно да прекине и интернетот треба да остане простор за слободно изразување на мислење, изјави Муижниекс.
Азербејџан кон крајот на 2012 година ги засили санкциите против учесниците во непријавените протести, што доведе до серија апсења и распити. Активистите за човекови права постојано го обвинуваат режимот на претседателот Илхам Алиев за прогон на новинари и затворање на опозиционери.