Тензиите на границата помеѓу Полска и Белорусија продолжија и денеска додека неколкуте илјади мигранти се обидуваат да влезат на територијата на ЕУ.
Полскиот премиер Матеуш Моравјецки бегалската криза на границата со Белорусија ја опиша како нов вид на војување и дел од „координираниот напад“ обвинувајќи ја Белорусија дека намерно ги пушта мигрантите. Според него, во целата криза е вмешана и Русија и нејзина идеја е испраќањето на мигрантите кон полската граница.
Од друга страна, официјален Минск ги отфрли обвинувањата дека белоруски војници ја преминувале границата со Полска, а Русија испрати два стратешки бомбардери во воздушниот простор на Белорусија.
Kuźnica: próba sforsowania polskiej granicy pic.twitter.com/kqCkLPdsiK
— Ministerstwo Obrony Narodowej ?? (@MON_GOV_PL) November 8, 2021
Германската канцеларка Ангела Меркел побара од рускиот претседател Владимир Путин да интервенира на белоруско-полската граница, а НАТО истакна дека Алијансата ќе ја подржи Полска на нејзините граници.
Рускиот претседател Владимир Путин во телефонски разговор со германската канцеларка Ангела Меркел ги повикал лидерите на Европската унија да воспостават директни контакти со Белорусија поради решавање на мигрантската криза .
Официјалните претставници на белоруската гранична контрола предупредија дека постапките на Варшава можат да доведат до оружени судири помеѓу Полска и Белорусија.
-Тоа што белоруските безбедносни сили користат оружје против бегалците е снимено во неколку наврати. И покрај тоа, реакциите од ЕУ изостанаа, што укажува на тоа дека постои договор да се користат сите средства за да заврши оваа мигрантска криза на границата.