Руските воени единици, на кои претседателот Владимир Путин вчера им нареди да ја напуштат зоната во близина на украинската граница, се подготвени за повлекување, соопшти денеска Министерството за одбрана во Москва.
Путин вчера издаде наредба војниците, кои учествувале во маневрите во близина на границата со Украина – во Ростовската, Белгородската и Бранската област, да се вратат во своите касарни.
Воениот состав веќе ги демонтира шаторите, ја товари опремата, формира колони од оклопни возила, се додава во соопштението.
САД и НАТО вчера истакнаа дека се уште немаат докази за повлекување на илјадниците војници, кои од март се наоѓаат крај украинската граница.
– За жал не гледаме никакви докази дека Русија ја повлекува својата армија од границата со Украина. Многу жалам за тоа, бидејќи тоа би бил првиот јасен напор за смирување на ситуацијата. Ако забележиме видливи докази дека руските војници се повлекуваат од границата, први ќе го поздравиме тоа, тоа ќе биде прв чекор кон вистинска насока, изјави генералниот секретар на НАТО Андерс Фог Расмусен.
Руската агресија против Украина драматично ја промени безбедносната ситуација во Европа и ги става пред искушение основните принципи – правото на суверените држави сами да го избираат својот пат. Претседателот на Русија Владимир Путин не го исполни ветувањето на Москва да ги почитува овие принципи, коментира генералниот секретар. Според него овие настани ќе се одразат на односите на НАТО во иднина.
На 25 мај во Украина претстојат претседателски избори, тоа е можност за мирен излез од настаните во земјата. Сите Украинци ќе можат да направат свој избор по закон, во согласност со меѓународните стандарди. Тоа е изборот, што ќе биде прифатен од меѓународната заедница, изјави Расмусен. Според него попречувањето на спроведувањето на изборите ќе создаде пречка за мирно решавање на кризата.