Со потпис на гувернерот, американска сојузна држава Мисисипи го отстрани симболот на Конфедерацијата од своето знаме. Мисисипи беше последната американска држава чие знаме се уште го содржеше тој амблем, кој се смета за симбол на расизмот, јавува Гласот на Америка.
Републиканскиот гувернер, Тејт Ривс, вчера го потпиша историскиот закон со кој веднаш се укинува официјалниот статус на знамето, кое со генерации е извор на поделби.
– За мене, ова не е политички момент, туку сериозна и важна можност нашето семејство да се собере во Мисисипи, да се помири и да продолжи понатаму, рече Ривс пред да го потпише законот.
Мисисипи беше под голем притисок да го смени знамето откако протестите против расната нееднаквост во последните неколку недели го привлекоа вниманието кон симболите на Конфедерацијата.
Државното собрание во неделата усвои закон за промена на знамето, по емотивна расправа за време на викендот и децениските напори на афроамериканските законодавци и други граѓани, кои го сметаа амблемот на Југот од Граѓанската војна за симбол на омраза и расизмот.