Германскиот канцелар Ангела Меркел го осуди обидот за воен удар против претседателот на Турција Реџеп Таип Ердоган и нагласи дека Берлин е на страната на оние кои ја заштитуваат демократијата и владеењето на правото во Турција.
– Од името на целата Влада најкатегорично го осудувам обидот да биде насилно соборена законски избраната турска Влада, изјави таа пред новинарите во Берлин.
Таа додаде дека мерките кои ќе бидат преземени против виновниците за трагичните настани синоќа треба да бидат исклучиво согласно законите на правната држава.
– Трагично е тоа колку многу луѓе загинаа за време на тој обид за преврат. Крвопролевањето во Турција треба веднаш да запре. Турскиот народ има право да го избира својот политички лидер на слободни избори, а политичките промени треба да се постигнуват во рамки на политичките институции и правилата за демократски натпревар. Тенковите по улиците и воздушните напади врз сопствениот народ се неприфатливи, рече Меркел.
Таа додаде дека кризниот штаб на Министерството за надворешни работи одржува постојан контакт со дипломатските претставништва во Турција, а Министерството за одбрана ја следи ситуацијата во базата Инџирлик.