Германскиот канцелар Ангела Меркел истакна дека Германија е против признавањето палестинска држава, откако пратеници од неколку европски држави го поддржааа ваквиот чекор, пренесоа американските медиуми.
Новата шведска Влада на 30 октомври официјално ја призна палестинската
држава. Неделава и Парламентот на Шпанија одобри необврзувачка резолуција, која, исто така, ја признава палестинската држава, по сличните постапки на Велика Британија и Ирска.
Германија, меѓутоа, земјата која е најблискиот европски сојузник на Израел, соопшти дека нема да го следи овој чекор.
Меркел денеска во Берлин изјави дека нејзината Влада го поддржува решавањето на израелско-палестинскиот конфликт преку формирање две држави, но „ние гледаме колку е тоа тешко и сметаме дека едностраното
признавање палестинска држава нема да ни помогне да одиме напред кон таа цел“.
– Подобро е нашите напори да ги фокусираме врз заживувањето на израелско-палестинскиот дијалог, иако во сегашните услови и тоа изгледа многу тешко, рече Меркел.