Кандидатот за германски канцелар, Фридрих Мерц, лидер на германската централно-десничарска партија Христијанско-демократска унија (ЦДУ), во интервју за јавниот сервис АРД, категорично отфрли каква било соработка со екстремно десничарската Алтернатива за Германија (АфД).
„Да повторам. Под мое водство нема да има соработка (на АфД) со ЦДУ во Германија“, рече Мерц.
Тој додаде дека причините се јасни и очигледни.
„Нема да соработуваме со партија која е ксенофобична, која е антисемитска, која има десничарски екстремисти во своите редови, која има криминалци во своите редови, партија која флертува со Русија и сака да ги напушти НАТО и Европската Унија“, нагласи Мерц.