По средбата со лицата кои го претрпеле пожарот во кулата Гринфил, британската премиерка Тереза Меј, од местото си заминала со силна полициска заштита.
Имено, додека си заминувала, демонстранти кои се незадоволни со одговорот на британската Влада по повод трагедијата во која животот го загубија над 30 лица, викале и оделе по нејзиниот автомобил.
Меј се состанала со лицата кои го претрпеле пожарот, како и со општинските претставници од Кенсингтон-Челси, при што ветила помош од 5.709.222 евра.
Десетици гневни демонстранти претходно денеска упадаа во зградата на општинскиот совет во лондонскиот кварт Кенсингтон- Челси, на чија територија се наоѓа опожарената кула Гринфил.
Лондонските демонстранти ја турнаа автоматската врата што води кон првиот кат и беа запрени на скалите на вториот кат од неколкумина чувари. Се создаде тепаница меѓу демонстрантите и чуварите и при тоа дел од нив ја напуштија зградата.
Демонстрантите што се наоѓаа во зградата, како и они што стоеа пред неа, скандираа „Сакаме правда“, „Срам за вас“ , „Убијци“.
Некои од демонстрантите носеа транспаренти со натпис „Правда за Гринфил“.
Одделен протест од околу 200 лица се одржа и кај метро станицата Нотигхил, со инсистирање за побрзо дејствување од страна на општинските советници одговорни за сместувањето на лицата кои останале без дом.