Русија има воен потенцијал да го нападне Киев и главните објекти на НАТО, така што од нив да не остане „ни камен на камен“, туку само нуклеарна прашина, изјави заменик-претседателот на Советот за безбедност на Русија, Дмитриј Медведев, во интервју за весникот „Ведомости“.
„Нашиот воен потенцијал овозможува напад врз Киев и главните објекти на НАТО, така што од нив да не остане ни камен на камен, туку само сива нуклеарна прашина“, рече Медведев.
Тој оцени дека таквиот чекор би претставувал „точка на апсолутен поврат“ за целата планета, а не само за страните во конфликтот.
Медведев наведе дека Русија ја разбира својата одговорност за судбината на човештвото и дека со сите сили се обидува да спречи глобална катастрофа, но предупреди дека нејзиното трпение „не е безгранично“.
Говорејќи за нуклеарното оружје, тој рече дека тоа може да биде употребено во одредени случаи и дека тоа не е „плашило“, туку реалност предвидена со руската нуклеарна доктрина.
Според неговите зборови, агресијата на која било ненуклеарна држава против Русија или Белорусија, со учество или поддршка од нуклеарна сила, се смета за заеднички напад врз двете земји.
„Имаме целосно право да дадеме одговор на критична закана за нашиот суверенитет. Конечната одлука ја носи шефот на државата“, нагласи Медведев.
Медведев оцени дека „колективниот Запад“, кој континуирано го поддржува Киев, „намерно се обидува да го доведе светот на работ на нуклеарна апокалипса“.
Како пример го наведе упадот на украинските вооружени сили во Курската област, нападите врз Запорожската нуклеарна електрана и секојдневните напади врз руските градови, оценувајќи дека тоа не се „специјални ефекти“, туку агресивни дејствија кои еден ден би можеле да предизвикаат Трета светска војна.
Медведев додаде дека крајната варијанта останува резервирана за ситуација во која сите други средства повеќе нема да бидат ефикасни.