Русија ги предупреди европските земји дека ќе ги гони сите што ќе се обидат да ги запленат нејзините средства по извештаите дека Европската Унија размислува да користи милијарди долари замрзнати руски средства за да ѝ помогне на Украина.
Откако претседателот Владимир Путин ја испрати својата војска во Украина во 2022 година, САД и нивните сојузници ги забранија трансакциите со руската централна банка и Министерството за финансии и блокираа 300 до 350 милијарди долари руски средства, претежно европски, американски и британски државни обврзници што се чуваат во Европскиот депозитар за хартии од вредност.
Ројтерс објави дека претседателката на Европската комисија, Урсула фон дер Лајен, сака Европската Унија да најде нов начин да ја финансира одбраната на Украина од Русија користејќи замрзнати руски средства.
Политико објави дека Европската комисија размислува да ги користи руските парични депозити во Европската централна банка од доспеани обврзници во руска сопственост за да финансира „заем за закрепнување и реконструкција на Украина“.
„Доколку се случи ова, Русија ќе ги гони европските дегенерици од Брисел и поединечни земји-членки кои се обидуваат да ги запленат нашите средства, до крајот на векот“, напиша Дмитриј Медведев на Телеграм.
Русија ќе ги гони европските држави на „сите можни начини“ и во „сите можни меѓународни и национални судови“, како и „вон суд“, рече Медведев, кој е заменик-претседател на Советот за безбедност на Русија.
Русија тврди дека секое запленување на нејзините средства претставува кражба од страна на Западот и ќе ја поткопа довербата во американските и европските обврзници и валути.