Поранешниот руски претседател Дмитриј Медведев сугерираше дека британските војници задолжени за обука на украинските трупи во Украина ќе бидат легитимни цели за руските сили, како и германските фабрики кои произведуваат ракети Таурус доколку го снабдуваат Киев.
Медведев, кој сега е заменик-претседател на Советот за национална безбедност на Русија и е сè повоинствен и антизападен руски политичар, рече дека таквите чекори на Западот водат кон Трета светска војна.
Во објавата на Телеграм, Медведев најпрво го насочи својот гнев кон неодамна назначениот британски министер за одбрана Грант Шапс, кој во интервју за весник рече дека Лондон сака да распореди воени инструктори во Украина, покрај обуката на украинските вооружени сили во Велика Британија или во други западни земји како и досега.
„Ова ќе ги претвори нивните инструктори во легитимна цел на нашите вооружени сили, добро знаејќи дека ќе бидат безмилосно уништени. И тоа не како платеници, туку токму како британски специјални сили на НАТО“ напиша Медведев на Телеграм.
Медведев потоа го сврте вниманието кон Германија, осудувајќи ги оние кои сакаат Берлин да и испорачува на Украина ракети Таурус кои би можеле да ја погодат руската територија и да се обидат да ја ограничат Москва да ги снабдува своите војници.
„Тие велат дека тоа е во согласност со меѓународното право. Па, во тој случај, ударите врз германските фабрики каде што се произведуваат овие проектили, исто така, ќе бидат целосно во согласност со меѓународното право“, рече Медведев.
„Овие морони активно не туркаат кон Трета светска војна“, рече Медведев.