Милитантите на Хамас извршиле масакр во Кибуцот Кфар Аз во јужен Израел во нападот за време на викендот, во кој беа „брутално убиени жени, деца, бебиња и постари лица“, изјави генерал-мајорот на израелските одбранбени сили (ИДФ), Итаи Верув.
„Видовме бебиња, мајки, татковци во нивните спални соби, терористите брутално ги убиле“, рече Верув и додаде: „Тоа не е војна, не е бојно поле. Тоа е масакр“.
ИДФ соопшти дека не може да потврди колку точно луѓе се убиени таму и дека нема да навлегува во детали за тоа како биле убиени. „Свесни сме за грозоморните дела за кои е способен Хамас“, рекоа тие.
ИДФ реагираше на извештајот на новинската агенција i24 дека некои нејзини војници кои пристигнале во Кфар Аза откриле дека биле извршени страшни злосторства врз жртвите. Претходно денеска, израелски генерал го опиша за Си-Ен-Ен моментот кога армијата ги пронашла телата во Кибуцот Кфар Аз:
„Никогаш не сум видел вакво нешто во мојата кариера, никогаш во мојата 40-годишна служба не можев да го замислам ова“, рече тој.
Војниците му рекоа на меѓународниот уредник на Би-Би-Си, Џереми Боуен, дека Хамас упаднал во кибуцот, палејќи куќи и убивајќи семејства. Еден израелски офицер изјави дека некои од загинатите биле обезглавени.
До утрово борбите се уште се водеа во кибуцот. Затоа израелските војници дури сега ги собираат телата на убиените жители.