Бројот на припадниците на полицијата во Марсеј осомничени за вмешаност во корупција се зголеми вчера на 30, по што уште 18 полицајци се суспендирани, објави Frans pres.
Припадниците на единицата која работела во најтешките зони во градот на југот на Франција беа суспендирани откако во петокот е подигнато обвинение против 12 од нивните колеги, под сомнение за вмешаност во изнудување и “дилање” дрога.
Седуммина од нив се во притвор во очекување на понатамошна истрага, додека останатите петмина се ослободени со кауција.
Со најновата суспензија, речиси половина од 70 членови од Криминалистичката бригада на северот на Марсеј се под истрага, која почнува да личи на најсериозен случај на корупција во полицијата во француската историја.
Повеќето од осомничените полицајци биле приведени минатиот вторник под сомнение за одземање на дрога и пари од дилери на дрога и ги задржувале цигарите запленети од шверцерите.
Надлежниот обвинител во петокот рече дека обвинителството има изобилство докази за нивната вина, а таа полицијска единица ја опиша како “гангрена” во француските безбедносни сили.