Францускиот претседател Емануел Макрон вчера го критикуваше планот на американскиот претседател Доналд Трамп да ја преземе контролата врз Гренланд, велејќи дека Гренланд „не треба да се продава“ или „окупира“.
„Со неколку зборови, сите во Франција, во Европската Унија, мислат дека Гренланд не треба да се продава или окупира“, рече Макрон на прес-конференција во главниот град на Гренланд, за време на посетата на арктичката територија под данска администрација, објави АП.
Макрон рече дека пренесува порака за француска и европска солидарност.
– Ситуацијата во Гренланд е јасно повик за будење за сите Европејци. Дозволете ми да ви кажам многу директно дека не сте сами, додаде Макрон.
Францускиот претседател го посети Гренланд на пат кон Канада, каде што се одржува самитот на Г7, на кој ќе присуствува и Трамп.
Макрон беше пречекан во Нук, главниот град на Гренланд, од данската премиерка Мете Фредериксен и гренландскиот премиер Јенс-Фредерик Нилсен.
На прашањето дали Франција би била подготвена да му обезбеди воена поддршка на Гренланд доколку Трамп одлучи да изврши инвазија, Макрон рече дека „одбива да разговара за таа хипотеза“.
„Нема јавно да елаборирам за сценаријата „што ако“. Бидејќи не верувам дека на крајот САД, кои се сојузник и пријател, некогаш би направиле нешто агресивно против друг сојузник“, заклучи Макрон.
Макрон, Фредериксен и Нилсен одржаа состанок на дански носач на хеликоптери, а потоа тројцата се упатија кон брзо топен глечер за да ги набљудуваат ефектите од климатските промени, објавува АП.
Лидерите разговараа и за економскиот развој, транзицијата кон нискојаглеродна енергија и критичните минерали.