Мајка и шест деца, на возраст од 3 до 11 години, загинаа во експлозија и пожар во куќа во централна Пенсилванија, соопштија локалните власти, објави АП денес.
Пожарникарите кои реагираа на пријава за експлозија и пожар во куќа во општината Ламар во округот Клинтон, во близина на Мил Хол, во недела наутро потврдија дека седум лица се заробени на местото на настанот, но не беа во можност да ја пребараат зградата зафатена од пламен, соопшти државната полиција на Пенсилванија.
Сите седуммина загинаа, а полицијата ги идентификуваше како Сара Столкфус (34), нејзините четири сина, на возраст од 11, 10, пет и три години, и две ќерки, на возраст од осум и шест години.
Причината за експлозијата е под истрага, а се сомнева дека истекување на гас во домот можеби ја предизвикало експлозијата и пожарот, соопшти полицијата, забележувајќи дека надворешните резервоари за пропан не експлодирале и не биле фактори кои придонеле за експлозијата и пожарот.