Венецуелскиот претседател Николас Мадуро застана во одбрана на изборниот систем на таа земја, кој го нарече „најбезбеден“ во светот, откако опозицијата се подели при признавањето на резултатите од регионалните избори, на кои владејачките социјалисти во неделата извојуваа моќна победа.
И покрај незадоволството поради економската ситуација и спротивно на анкетите, владејачката партија на Мадуро доби 17 од вкупно 23 гувернери во земјата. Опозициската коалиција за демократско единство МУД одби да ги признае резултатите од изборите, нарекувајќи ги „наместени“, чиј став го прифати и САД. Сепак, двајца опозициски кандидати ги признаа изборните резултати.
Најсилни критики на сметка на изборните резултати пристигнаа од Вашингтон, од каде владеењето на Мадуро е наречено „диктаторско“. Неколку европски држави, исто така, изразија загриженост, додека 12 земји од Латинска Америка, предводени од Перу, ги осудија „пречките, заканите, манипулациите и неправилностите“ на изборите.
Венецуелската власт ги отфрла обвиненијата за изборна измама.
– Изборниот систем на Венецуела е најбезбедниот и најконтролираниот систем во светот, изјави Мадуро. Воедно тој на американскиот претседател Доналд Трамп му порача: „Јас не сум диктатор, туку скромен работник. Имам мустаќи и изгледам како Сталин, но јас не сум тој“.