Венецуелскиот претседател Николас Мадуро, кој е и врховен командант на вооружените сили, издаде наредба за воведување зголемена готовност и преместување на 25.000 војници на границата со Колумбија, како и на бреговите на Карипското Море и Атлантскиот Океан. Мадуро рече дека главната цел на мобилизацијата е заштита на суверенитетот и безбедноста на земјата.
„Наредив распоредување на 25.000 претставници на нашата храбра Боливарска армија за зајакнување на оперативно-тактичките групи за брза реакција во пограничната област со Колумбија, како и на карипскиот и атлантскиот брег“, рече шефот на државата на својот Телеграм канал.
Во исто време, американскиот претседател Доналд Трамп го критикуваше, како што рече, недоволниот ангажман на Венецуела во борбата против трговијата со дрога. Според извештаите, на 19 август, три разорувачи на американската морнарица – USS Gravely, USS Jason Dunham и USS Sampson – беа испратени во јужниот дел на Карипското Море како дел од операциите насочени кон сузбивање на нарко-картелите.
Покрај тоа, нуклеарната подморница „УСС Њупорт Њуз“, крстосувачот со водени ракети „УСС Лејк Ери“, десантни пловила и контингент од 4.500 американски војници беа распоредени на венецуелскиот брег.
На 2 септември, американскиот претседател објави дека американската војска убила 11 членови на венецуелски нарко картел во меѓународни води. Акцијата дополнително ги зголеми тензиите во регионот, додека Каракас изјави дека „ќе го брани својот територијален интегритет и суверенитет од каква било надворешна закана“.