Претседателот на Белорусија, Александар Лукашенко предупреди дека неговата земја повеќе нема да се обидува да го запре приливот на илегални мигранти во Европската унија.
Тој, меѓу другото, тоа го изјави по повод новите санкции на ЕУ и САД против Белорусија поради приземјувањето на патничкиот авион на „Рајанер“ и апсењето на новинарот Роман Протасевич минатиот месец.
Лукашенко ги нарече санкциите „хибридна војна“ на Западот против Белорусија и ги предупреди своите соседи од ЕУ – Летонија, Литванија и Полска да не очекуваат белоруските власти да ги запрат илегалните мигранти да ги преминат нивните граници.
– Тие бараат од нас да ги заштитиме од шверц и дрога. Само да ве прашам, дали сте луди? Вие започнавте хибридна војна против нас и сега барате да ве заштитиме, како што тоа го правевме порано, истакна Лукашенко.
Претходно овој месец, литванските власти ја обвинија Белорусија дека им дозволува на мигрантите да ја преминуваат заедничката граница.