Американскиот претседател Доналд Трамп денес му порача на Авганистан дека „лоши работи ќе се случат“ ако земјата не ја врати воздухопловната база Баграм на САД.
– Ако Авганистан не ја врати воздухопловната база Баграм на оние што ја изградиле, а тоа се САД, лоши работи ќе се случат – рече Трамп во објава на социјалната мрежа Truth Social.
Трамп претходно изјави дека разговарал со авганистанските власти за повторно преземање на контролата врз воената база Баграм, клучен објект што го користеле американските сили за време на војната во таа земја.
– Не требаше да го напуштиме Авганистан, им рече Трамп на новинарите во Овалната соба на Белата куќа, коментирајќи го повлекувањето на американските сили од базата во 2021 година, што им овозможи на Талибанците да ја преземат контролата, пренесува Ројтерс.
Изјавата дојде еден ден откако Трамп, за време на заедничката прес-конференција со британскиот премиер Кир Стармер, рече дека САД сакаат да ја вратат контролата врз базата, што беше клучна точка за американските операции по нападите од 11 септември 2001 година.
Воздухопловната база Баграм, која се наоѓа северно од Кабул, беше најголемиот американски воен објект во Авганистан и стратешка точка за воздушни и логистички операции за време на дведецениската војна.
Сепак, авганистанските власти ја отфрлија идејата за обновено американско воено присуство.
„Авганистан и САД треба да соработуваат, но без какво било американско воено присуство на наша територија“, изјави претставникот на авганистанското Министерство за надворешни работи, Закир Џалал, во објава на мрежата X.
„Волстрит џурнал“ претходно објави, повикувајќи се на добро информирани извори, дека САД се во преговори со Талибанците за повторно воспоставување на американско воено присуство во воздухопловната база Баграм во Авганистан, за да ја користат како појдовна точка за антитерористички операции.
Разговорите вклучуваат враќање на американските специјални сили во ограничен капацитет во воздухопловната база Баграм, договор за размена на затвореници, можен економски договор и безбедносна соработка.