Лидерите на Европската унија се согласија да одговорат на итните финансиски потреби на Украина во следните две години, но се воздржаа од експлицитно овластување за користење на замрзнатите руски средства за да обезбедат голем заем на Киев откако Белгија изрази загриженост.
Европскиот совет е посветен на одговор на итните финансиски потреби на Украина за периодот 2026-2027 година, вклучувајќи ги и нејзините воени и одбранбени напори, според текстот усвоен од сите лидери на ЕУ освен Унгарија на самитот во Брисел, објави Ројтерс.
Текстот, до кој агенцијата имаше пристап пред неговото официјално објавување, бара од Европската комисија да презентира „опции за финансиска поддршка врз основа на проценка на финансиските потреби на Украина што е можно поскоро“.
Во текстот, исто така, се наведува дека, во согласност со законодавството на ЕУ, руските средства треба да останат замрзнати сè додека „Русија не ја заврши својата агресивна војна против Украина и не ја надомести штетата предизвикана од таа војна“.
Сепак, текстот не ја поддржува експлицитно употребата на овие средства за финансирање на таканаречен „кредит за репарација“ во вредност од околу 140 милијарди евра, што е предлог на Европската комисија кој е поддржан од голем број земји-членки на ЕУ, соопшти агенцијата.