Лидерката на француската десница Марин Ле Пен повика вчера на усвојување на “нов договор” за имиграцијата и го критикуваше, како што рече, ширењето на „Советска Европска унија.”
Во огнениот говор на Универзитетот во Кембриџ, пред кој се собраа околу 100 демонстранти, противници на лидерката на Националниот фронт, Марин Ле Пен зборуваше за теми кои ги смета за клучни политички прашања во Франција, Европа и светот.
„Јас силно се залагав Европа да ја укине имиграцијата и Шенгенскиот договор и да се подготви за враќање на националните валути”, рече Ле Пен, истакнувајќи ја потребата да се воспостави “силна држава” во Франција, која, како што верува, е ослабена од европската унија.
Нејзиниот говор после кој следеа бројни прашања на студентите, беше пропратен со протест, на кој демонстрантите носеа, меѓу другото, натписи: „Ф како фашизам, Н како нацизам – Национален фронт”