Рускиот министер за надворешни работи Сергеј Лавров изјави дека Русија е отворена за преговори, но дека Украина не покажува способност за преговори. Лавров во интервју за бразилскиот весник „Глобо“ изјави дека „топката не е во дворот на Москва“.
„Киев досега не покажа способност за преговори. Инаку, како можеме да го објасниме фактот дека украинските вооружени сили не можеа да го почитуваат ниту 30-дневниот мораториум за напади врз енергетските објекти (од 18 март до 17 април), ниту 30-часовното велигденско примирје“, рече Лавров, пренесе РИА Новости.
Лавров рече дека „украинските власти покажаа недостаток на политичка волја за мир и неподготвеност да се откажат од продолжување на војната“. Зборувајќи за контактите меѓу Русија и САД за постигнување мировен договор во Украина, Лавров истакна дека, според впечатоците на Москва, „американските соговорници почнале подобро да го разбираат ставот на Русија за ситуацијата во Украина“.
Лавров нагласи дека очекува САД да го имаат ова предвид за време на дијалогот со Киев и поединечните европски земји.
