Британската министерка за надворешни работи, Ивет Купер, ги пречека шефовите на дипломатиите на земјите од Западен Балкан во замокот Хилсборо во близина на Белфаст. На Самитот за Западен Балкан, кој е дел од Берлинскиот процес, со кој Обединетото Кралство претседава оваа година, се разговара за безбедноста и стабилноста во регионот, економскиот просперитет и миграцијата, најави Купер.
„Тука сме заедно да ја поддржиме стабилноста и безбедноста на Западен Балкан, бидејќи знаеме дека тоа придонесува за безбедноста на цела Европа, вклучително и нашата безбедност во Обединетото Кралство. Ние сме во замок кој е симбол на мир, напредок и помирување“, рече Купер.
На Самитот, таа ќе објави и нов проект вреден четири милиони фунти за зајакнување на кибер отпорноста во регионот и размена на искуства во борбата против дезинформациите и другите малигни активности од страна на непријателски актери. Ова првенствено се однесува на нападите од Русија. На Самитот, Купер ја изрази својата поддршка за „настаните на Блискиот Исток синоќа“.
„Договорот за првата фаза од мировната иницијатива на претседателот Трамп е момент од длабоко значење, олеснување и надеж. Сакам да им оддадам почит на преговарачите од Соединетите Американски Држави, Катар, Египет, Турција и многу други земји кои работеа толку посветено со месеци за да стигнат до оваа точка, по две години најразорни страдања, во кои беа изгубени десетици илјади животи, со болката на заложниците кои беа држени толку долго и хуманитарната криза што се одвиваше“, рече Купер, додавајќи дека договорот за прекин на огнот, враќање на хуманитарната помош и ослободување на сите заложници е од огромно значење и мора да се спроведе што е можно побрзо.