Се уште нема реакција од Саудиска Арабија на понудата на претседателот на Русија, Владимир Путин Ријад да купи руски ракетен систем С-400, соопшти денеска Кремљ.
Путин вчера и понуди на Саудиска Арабија руско оружје.
– Подготвени сме да обезбедиме значителна помош за Саудиска Арабија и земјата би донела мудра државничка одлука како што своевремено направи Иран со купувањето на С-300 и како што турскиот претседател Реџеп Тајип Ердоган направи кога го купи последниот С-400 противвоздушен одбранбен систем од Русија. Таквото оружје би ја заштитила секоја инфраструктурна постројка во Саудиска Арабија, изјави Путин во Анкара, каде присуствува на трилатералната средба (Турција – Иран – Русија) за Сирија.
Портпаролот на Кремљ, Дмитриј Песков изјави дека Москва се уште не примила официјално барање од ниту една страна да биде медијатор помеѓу Саудиска Арабија и Иран по нападите врз саудиските нафтени постројки.
Тој додаде дека Москва не добила нови информации за нападот кои би помогнале во донесувањето на конечни заклучоци за инцидентот.
– Не фаворизираме никакви прерани заклучоци и обвиненија за тоа кој е одговорен за овој напад, посочи Песков.