Русија денеска соопшти дека ги почитува резултатите од референдумите во двата региони во источна Украина и оти очекува нивна примена по мирен пат.
– Ние во Москва ја почитуваме волјата на народот во областите Доњецк и Луганск и очекуваме практична примена на исходот од референдумот на цивилизиран начин, преку дијалог и без ново насилство, се наведува во соопштението на Кремљ.
Проруските сили во регионот Доњецк во источна Украина прогласија победа на вчерашниот референдум, откако по преброените сто проценти од гласачките ливчиња е утврдено дека 89,7 отсто од гласачите се изјасниле за независност, „против“ биле 10,19 отсто, а 0,74 проценти од гласачките ливчиња се невалидни.
Според првичните резултати меѓу 94 и 98 отсто од гласачите во областа Луганкс се изјасниле за независност.
Властите во Киев, меѓутоа го отфрлија референдумот, нарекувајќи го фарса, а Европската унија соопшти дека нема да ги признае резултатите од референдумот.