Лавмор Мањика, 22-годишен крадец од Зимбабве, побара од Судот да биде осуден на доживотен затвор, бидејќи смета дека животот зад решетките е подобар отколку на слобода.
Младиот криминалец во текот на расправата, која требаше да доведе до ублажување на неговата казна, на парче хартија напишал дека сака засекогаш да остане во затвор.
Животот во затвор е подобар од животот на улица. Дали можам да добијам доживотен затвор? – прашал тој во пораката која ја прочитал судијата.
Судот, меѓутоа, не ја одобри молбата на Мањика, кој е осуден на „само“ три години затвор заради повторното дело кражба. Момчето од еден стан украло неколку електронски апарати и 1.800 долари во готовина.
Доколку може да исплати 1.956 долари, казната ќе му биде намалена на шест месеци затвор.
Барањето на Мањика предизвика чудење особено ако се има предвид дека затворите во Зимбабве често пати се мета на организациите за заштита на човековите права, поради прекумерниот број затвореници и недостигот на храна.