Министерката за надворешни работи на Австрија, Карин Кнајсел смета дека во случај на „тврд“ Брегзит односно недоговорено излегување на Велика Британија од ЕУ, на Австријците во таа земја треба да им се овозможи двојно државјанство.
Кнајсел, на прес-конференција наведе дека во Велика Британија живеат околу 25.000 државјани на Австрија.
Со цел да овозможи двојно државјанство, Австрија, според неа, треба да се повлече делумно од Европската конвенција за одбегнување на двојното државјанство.
Како што констатираше, тоа веќе го сторија другите држави членки на ЕУ.
Сепак, додаде дека таков чекор не значи дека Австрија во иднина ќе ја отвори вратата за двојно државјанство.
Сумирајќи ги резултатите од австриското претседателство, Кнајсел рече дека е задоволна и дека ЕУ треба да почне да „гледа подалеку од својот нос“, односно посилно да размислува геополитички.